Қызға қырық үйден тиым

Ұлттық тәрбиені ұлықтау мақсатында мектебімізде "Даналық мектебі" клубының іс-шара жоспарына сәйкес "Қызға қырық үйден тиым" тақырыбында ақ жаулықты аналарымызбен сырласу, кездесу іс-шарасы өткізілді. Әженің тәрбиесі ізгіліктің жарығындай бала жүрегін нұрландырып тұрады. Көпті көрген аналарымыздың өмірден алған тәжірибесі мол. Бар жылы-жұмсағын тауысып, ыстық-суығын ажыратып, бойындағы бар жылуын өз жанының бөлшегіне бөліп беруге даяр ата мен әже - кемел келешекке ақыл үлестіруші кемеңгер. Атам қазақтың ұрпақ тәрбиесін жоғары қойғандығы соншалық, туған-туыс, бір рулы ел болып, қала берді бүкіл ауыл болып атсалысқан. Әсіресе, үйдегі көпті көрген қарт ата мен әженің тәрбиесі үлкен рөл атқарады. Жиналған ақ жаулықты асыл әжелер мен аналарымыздың өскелең ұрпаққа айтар тәлімдері мен ақыл-кеңестері тыңдалды.